ကော့မှူးမြို့နယ်ကနေ ရွေးကောက်ပွဲဝင်မယ့် Orchid ဟိုတယ်ပိုင်ရှင် ဦးဌေးအောင်ကို နိုင်ငံတော်အကြည်ညိုပျက်စေမှု့ဖြင့် ဖမ်းဆီး
ရန်ကုန်တိုင်းဒေသကြီး၊ ကော့မှူးမြို့နယ်မှ ဝင်ရောက်ယှဉ်ပြိုင်မည့် ကိုယ်စားလှယ်လောင်း Orchid ဟိုတယ်ပိုင်ရှင် ဦးဌေးအောင်ကို နိုင်ငံတော်အကြည်ညိုပျက်စေမှု ပုဒ်မ ၁၂၄(က)ဖြင့် (ဩဂုတ် ၂၁ရက်) ညနေပိုင်းက ဖမ်းဆီးခဲ့ကြောင်း သိရသည်။
ဦးဌေးအောင်သည် ၂၀၂ဝပြည့်နှစ် ရွေးကောက်ပွဲတွင် ကော့မှုးမြို့နယ်မှပင် ဝင်ရောက်ယှဉ်ပြိုင်မည့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ရွေးကောက်ပွဲ ကော်မရှင်မှတစ်ဆင့် ကန့်ကွက်လွှာတင်သွင်းခဲ့သူဖြစ်ပြီး အမျိုးသားဒီမိုကရေစီ အဖွဲ့ချုပ်ပါတီအား နိုင်ငံခြား အထောက်အပံ့ရယူခဲ့သည်ဟုဆိုကာ သတင်းစာရှင်းလင်းပွဲပြုလုပ်ပြီး စွပ်စွဲပြောဆိုခဲ့ဖူးသည်။ ထို့အပြင်လူမှုကွန်ယက်တွင် Live လွှင့်ပြောဆိုမှုများစွာရှိခဲ့သည်။
ဦးဌေးအောင်အား ပုဇွန်တောင်မြို့နယ် အထွေထွေ အုပ်ချုပ်ရေးမှူးက တရားလိုပြုလုပ်၍ တရားစွဲ ဆိုခြင်းဖြစ်ပြီး ဝရမ်းဖြင့် ပုဇွန်တောင်မြို့မ ရဲစခန်းမှ ဖမ်းဆီးခဲ့ခြင်းဖြစ်ကြောင်းသိရသည်။
ဓာတ်ပုံ- U Htay Aung’s FB